Nýliðabikar Korku

Á landskeppninni sem haldin var að Ási í Vatnsdal í ágúst var afhentur nýliðabikar Korku en það er nýr farandbikar sem gefinn var af fjölskyldu Svans heitins frá Dalsmynni sem var virkur og öflungur félagi í Smalahundafélagi Íslands. Mikil ánægja var með þessa gjöf og í ár hlaut Herdís Erlendsdóttir bikarinn fyrir góðan árangur í sinni fyrstu keppni. 

Kærar þakkir fyrir gjöfina og með leyfi frá Höllu ekkju Svans birtum við hér tölvupóst sem hún sendi á félagið fyrir keppnina.

 

 

Ég ákvað að setja smávegis á blað um þessa ákvörðun okkar i fjölskyldunni, að gefa bikar til afhendingar á Landskeppni SFÍ

Fljótlega eftir að Svanur dó kom upp þessi hugmynd að gefa farandbikar sem yrði afhentur á Landskeppninni. Mig minnir að Jens Þór hafi stungið upp á að bikarinn yrði afhentur því nýliðapari sem stæði sig best á Landskeppni SFÍ. Mér fannst það frábær hugmynd og mikið í anda Svans. Hann var óþreytandi við að leiðbeina þeim sem voru að stíga sín fyrstu skref í að vinna með BC hunda. Mörg og löng símtöl, bauð fólki að koma með hundinn og fá leiðsögn um næstu skref og eftirfylgni og heimsóknir í framhaldinu.

Nafnið á bikarnum kom svo til strax, vissi að hann hefði örugglega ekki verið sáttur við að bikarinn héti Svansbikar og heldur ekki Dalsmynnisbikarinn. Í raun kom bara eitt nafn til greina.

Ég spurði hann að því þegar vitað var að hverju stefndi, hvaða hundur væri nú bestur af þeim hundum sem hann hefði átt. Svarið kom strax,  hann hefði nú átt þá marga góða, nefndi þar Skessu, Vask Tinna  að ógleymdum þeim fyrsta, honum Lubba frá Hausthúsum, en Korka væri þar fremst. Hún  hefði bara allt sem góður smalahundur þyrfti. Frábær vinnufjarlægð og vinnulag og þessi mikla útgeislun sem kindur virtust finna og virða. Enginn hundur betri í að koma óþekkum eftirlegukindum í aðhald og upp á kerru. Svo væri það stór kostur að það gætu allir notað hana, hún gerði sér engan mannamun. Ég var/er alltaf pínu ánægð með að hafa gefið henni nafn og get vottað að hún var líka einstakur heimilishundur, þurfti aldrei að hafa áhyggjur af því að hún færi að smala upp á eigin spýtur, elta bíla eða fugla. Alltaf róleg og yfirveguð.

Bikarinn fékk því nafnið Nýliðabikar Korku til minningar um þetta par, þau Svan og Korku.

Ég læt fylgja eignarbikar sem er bikar úr stóru bikarasafni Svans, þann bikar  fékk Skessa frá Hæl  árið 2002 þegar hún vann A flokkinn í Kjósarkeppninni.

Ég stefni að því að koma svo á keppnina á sunnudaginn.

 

Með bestu kveðju 

Halla Dalsmynni

 

Landskeppni Smalahundafélags Íslands 2024

Helgina 24.-25. ágúst sl. fór Landskeppni SFÍ fram að Ási í Vatnsdal í samstarfi við Smalahundadeild Snata í Húnavatnssýslu.

Keppt var í þremur flokkum, A-flokk, B-flokk og Unghundaflokki en þar mega hundar ekki vera orðnir eldri en þriggja ára, miðað við fæðingardag hunds. A-flokkur er ætlaður þeim sem hafa keppt áður enda er sú braut lengst og talsvert meira krefjandi atriði sem þarf að leysa. B-flokkur er hugsaður fyrir nýliða sem eru að taka sín fyrstu skref í keppni, hvort sem um ræðir hund eða þjálfara og er brautin talsvert styttri en í A-flokk og færri atriði sem þarf að leysa. Að þessu sinni voru 17 hundar skráðir til keppni og dreifðist það nokkuð jafnt á milli flokka. Veðrið var í svipuðum stíl og það hefur verið þetta sumarið, talsverð bleyta og lítið sást til sólar, en keppendur létu það ekki á sig fá enda vanir að þurfa að smala í margbreytilegum veðrum.

SFÍ er aðildarfélag að ISDS (International Sheepdog Society) og hafa undanfarin ár verið fengnir dómarar í gegnum ISDS til að dæma Landskeppni. Þetta hafa yfirleitt verið miklir reynsluboltar sem hafa verið ósparir á að veita keppendum góð ráð um hvað megi bæta og hvernig og erum við afar þakklát fyrir þetta góða samstarf. Dómarinn í ár var engin undanteking en það var bretinn George Bonsall sem naut aðstoðar Ingveldar Ásu Konráðsdóttur við að rita og fá þau kærar þakkir fyrir.

Besta tík mótsins var valin vinningshafi A-flokks, Míla frá Hallgilsstöðum en hún fékk einnig Tígulsbikarinn sem veittur er þeim hundi sem fær flest stig í keppninni. Besti hundur móts var Bassi frá Hríshóli sem lenti í 2. sæti í A-flokki. Nýr farandsbikar, í minningu Svans H. Guðmundssonar í Dalsmynni var veittur af Höllu Guðmundsdóttur ekkju Svans en hann lést árið 2022. Svanur var virkur félagi SFÍ og lagði metnað sinn í að aðstoða þá sem voru að stíga sín fyrstu skref í þjálfun BC fjárhunda. Bikarinn, sem nefnist Korkubikar eftir bestu tík Svans, fer til þess nýliðapars sem stendur sig best á landskeppni Sfí. Að þessu sinni var það Herdís Erlendsdóttir með tíkina Kríu frá Hjartarstöðum sem fékk afhentan Korkubikarinn. Höllu eru færðar bestu þakkir fyrir.

Sérstakar þakkir til Líflands og Kaupfélags Vestur-Húnvetninga sem styrktu mótið.

Úrslit voru eftirfarandi:

A-flokkur

1. sæti Maríus Halldórsson og Míla frá Hallgilsstöðum -170 stig

2. sæti Ingvi Guðmundsson og Bassi frá Hríshóli - 159 stig

3. sæti Sverrir Möller og Grímur frá Ketilsstöðum - 145 stig

 

B-flokkur

1. sæti Halldór Pálsson og Garpur frá Hallgilsstöðum - 124 stig

2. sæti Herdís Erlendsdóttir og Kría frá Hjartarstöðum - 115 stig

3. sæti Símon Helgason og Kjarkur frá Staðarhrauni - 98 stig

 

Unghundaflokkur

1. sæti Marzibil Erlendsdóttir og Patti frá Gunnarsstöðum - 106 stig

2. sæti Maríus Halldórsson og Dýri frá Presthólum - 72 stig

3. sæti Rune Brumoen og Glebe Fort Fern -28 stig

 

 Fellsbúð 23.08.2024

Aðalfundur Smalahundafélags Íslands að Fellsbúð 23. ágúst 2024

 

Gjaldkeri Smalahundafélags Íslands, Jens Þór, setti fundinn sem haldin var í réttarskúr Undirfellsréttar, Fellsbúð í Vatnsdal kl: 19:15.

Arnþór Jónsson var kjörinn fundarstjóri og ritari Ingveldur Ása Konráðsdóttir.

 

Dagskrá:

1.      Skýrsla stjórnar.

2.      Gjaldkeri fór yfir ársreikning.

a.      Arnþór spurði út kostnað við námskeið.

b.     Sverrir spurði út í þjónustukostnað banka, hann er mjög hár og ábending til stjórnar að skoða hvort hægt sé að lækka þennan kostnað. Stjórn þakkar ábendinguna og mun skoða málið.

c.      Rætt um vaxtakostnað.

d.     Ingibjörg spurði út í hvað sé inn í kostnaði frá LBHÍ. Inní því er Snati, þjónusta frá LBHÍ, vinna við að laga Snata o.fl.

e.     Sverrir bendir á að hægt sé að óska eftir einhverjum félagsmanni til að gera ársreikninginn. Stjórn þakkar ábendinguna.

Reikningar bornir undir fundinn og voru þeir samþykktir samhljóða.

3.       Kosningar:

1. Kosning í stjórn. Jens Þór Sigurðarson er að hætta í stjórn. Björn Viggó Björnsson gefur kost á sér. Samþykkt með lófataki. Við þökkum Jens fyrir vel unnin störf.

2. Kosning varamanns: Núverandi varamenn eru Bjarki Benediktsson frá Breiðavaði og Agnar Ólafsson frá Tjörn. Fundurinn samþykkti samhljóða að kjósa þá áfram sem varamenn.

3. Kosning skoðunarmanna reikninga: Ingibjörg Sigurðardóttir og Erla Jónsdóttir. Samþykkt samhljóða.

4. Kosning á umsjónamanni ættbókarforritsins Snata: Arnþór Jónsson og Elísabet Gunnarsdóttir gáfu bæði kost á sér áfram. Samþykkt samhljóða.

4.       Önnur mál:      

a.     Merki félagsins. Verkefni sem hefur verið nokkur ár í umræðunni. Nú eru komnar tvær tillögur að merki sem unnið var með frá síðasta aðalfundi þar sem samþykkt var að nota Tígul frá Eyrarlandi sem fyrirmynd og hafa útlínur Íslands sjáanlegar. Tillögurnar bornar undir félagsmenn og tillaga nr. 2 samþykkt með fyrirvara um að fótunum á Tígli sé breytt eftir athugasemd frá Lísu. Stjórn Sfí falið að klára merkið með þeim athugasemdum sem fram komu. Athugsemd að blái liturinn sé eins og liturinn í fánalitunum. Samþykkt.

b.    Reiðhallastyrkurinn. Jens fór yfir styrkinn og borið undir félagsmenn hvort vilji sé til að halda áfram með hann í sömu mynd og verið hefur. Samþykkt.

c.     Arnþór og Trausti með hugmynd að félagsmenn séu meira sýnilegri um landið til að auglýsa gagnsemi smalahunda og félagið.

d.    Lísa spyr út í deildir félagsins, hvernig sé hægt að styrkja þær. Félagsmenn veltu upp ýmsum hugmyndum.

e.    Stjórn SFÍ leggur til að styrkur til deilda félagsins vegna kostnaðar tengdum Landskeppni verði hækkaður úr 100.000 kr. í 200.000 kr. Samþykkt með meiri hluta atkvæða.

f.      Óskað eftir að stjórn félagsins komi með tillögu að almennu skipulagi milli félagsins og deilda félagsins.

g.    Tillaga frá Stjórn SFÍ að styrkja deildir félagsins til að halda námskeið. SFÍ vill með þessum styrk hvetja deildir félagsins að halda námskeið. Styrkurinn verði fyrir innlendan kennara 40.000kr og fyrir erlendan kennara 70.000kr. Hver deild getur sótt um styrk fyrir námskeið 1x á ári. Endurskoða að ári. Samþykkt.

h.    Stjórn SFÍ leggur til að styrkur til þeirra sem fara með hundinn sinn í ROM vinnupróf hjá ISDS fái styrkupphæð sem nemur 50% af heildarupphæðinni. Skilyrði að skrá hundinn í Snata. Í ár kostar prófið 500 pund sem eru rúm 90.000kr. Endurskoða árlega. Ef ekki er fjallað um þetta á næsta aðalfundi þá er styrkurinn sá sami. Samþykkt.

i.      Aðild að CSS – Continental Sheepdog Society. Lísa fór yfir stöðu mála. Borið undir fundinn að Lísa haldi áfram vinnunni, greini frekari kostnað og komi til stjórnar. Ásamt því að skoða Nordic sheepdog championship. Samþykkt.

j.      Landskeppni 2025. Austurlandsdeild hefur tekið að sér að halda Landskeppnina dagana 22.-24. ágúst 2025. Verður keppnin haldin á Ásunnarstöðum í Breiðdal hjá Rune Brumoen.

k.     Hlýðninámskeið fyrir smalahunda og grunnþjálfun þeirra. Stjórn SFÍ hefur fundað með Áshildi endurmenntunarstjóra Landbúnaðarháskólans um samstarf um að halda slík námskeið. Hún tók vel í samstarf við SFÍ og hefur verið leitað til Elísabetar Gunnarsdóttir um að vera umsjónarmaður um þetta verkefni fyrir hönd SFÍ og þróa áfram samstarfið. Á sama fundi var einnig rætt um að fá erlendan þjálfara til landsins og er stefnan tekin á tvö tveggja daga námskeið í mars. Ekki er komið í ljós hver verður kennari á þeim námskeiðum.

l.      Kennaranám í Noregi. Hugmynd sem varð til í vetur þegar Jo Agnar kom til landsins að halda námskeið. Norðmenn, NSG (Norsk sau og geit) tilbúnir að aðstoða SFÍ að mennta íslenskt fólk innan félagsins til að halda námskeið. Námið er þegar til í Noregi en þarf að yfirfæra námsefni yfir á ensku fyrir okkur. Tilgangurinn væri að mennta okkar eigið fólk og geta þá sótt með auðveldari hætti kennara innan landsteinana. Nokkrar kröfur eru gerðar til þeirra félagsmanna sem hugsa sér að sækja um að komast í námið og koma þær að stærstum hluta frá Noregi en einnig frá SFÍ. Uppsetning námsins verður með þeim hætti að námið stendur yfir í 10 daga samfleytt, líklega um mánaðarmótin nóv/des í Noregi. Um tilraunaverkefni er að ræða og því ekki víst hvort framhald verði á þessu námi en það verður tíminn að leiða í ljós. Að hámarki geta 7 aðilar sótt um námið frá Íslandi. Kostnaður við námið eru u.þ.b 60.000kr og síðan er það flug, gisting og uppihald og er því nokkuð óráðið hver sá kostnaður gæti orðið en kannski á milli 250.000kr - 350.000kr.

m.  Kröfur til námsins bornar undir atkvæði. Samþykkt með meiri hluta atkvæða.

n.   Stjórn SFÍ hefur gerir að tillögu sinni að félagið greiði styrk að upphæð 100.000 kr. fyrir hvern þann sem fer í námið. Samþykkt með meiri hluta atkvæða.

o.   Lísa fór yfir mikilvægi Snata.

p.   Rune opnar umræðu á ISDS skráða hunda hvort félagið ætti að breyta reglum á Landskeppni. Umræður milli félagsmanna. Stjórn falið að skoða málið með ISDS.

q.   Trausti gerir að tillögu sinni að stjórn SFÍ ræði við stjórn HRFÍ varðandi skráningar. Samþykkt.

r.    Lesið upp bréf frá Höllu í Dalsmynni, fjölskyldan vill gefa félaginu bikar sem afhenda á því nýliðapari sem stendur sig best á landskeppni. Vill félagið þakka fjölskyldunni í Dalsmynni kærlega fyrir gjöfina.

 

Fundarstjóri sleit fundi kl. 22:28

 

Fundinn sátu:

Arnþór Jónsson

Halldór Jónsson

Björn Björnsson

Maríus Halldórsson

Herdís Erlendsdóttir

Marsibil Erlendsdóttir

Sverrir Möller

Ingvi Guðmundsson

Elísabet Gunnarsdóttir

Rune Brumoen

Trausti Óskarsson

Ingibjörg Sigurðardóttir

Bjarki Benediktsson

Jens Þór Sigurðarson

Ingveldur Ása Konráðsdóttir

 

Gestur George Bonsall dómari landskeppninar.

Allir að verða spenntir fyrir helginni

Hér er mótaskráin.

Mótið hefst á morgun laugardaginn 24. ágúst kl. 10.

Í hádegishléi verður hægt að kaupa súpu og kaffi í Fellsbúð.

Sjáumst

Bjarki mótstjóri, Halldór, Björn og Ingveldur.

 

Sæl öll

Á aðalfundi á föstudaginn 23. ágúst 2024 verða þessi drög að kröfum til kennaranáms í Noregi lagðar fyrir. Einnig eru reglur sem SFI þarf að setja sér. Endilega kynnið ykkur þetta.

Smalahundafélag Íslands                                                                                                 8 -2024

 

Verkefni: Senda félaga úr Smalahundafélagi Íslands (SFÍ) í kennaranám í samstarfi við The Norwegian Association of Sheep and Goat Farmers (NSG). 

 

Fyrirhugað að hefja ferlið haustið 2024.

 

Grunnatriði sem félagar Smalahundafélags Íslands þurfa að uppfylla til þess að geta farið í kennaranám í Noregi.

1. Nemandi þarf að vera fullgildur meðlimur í Smalahundafélagi Íslands. Bæði skráður félagi og með sína BC vinnuhunda skráða í félagið (Snata). Ekki er þó gerð athugasemd við að félagsmenn séu með hundana skráða hjá öðrum félögum líka.

2. Nemandi þarf að sýna sanngirni í þjálfun og kennslu, gagnvart fólki, hundum og kindunum og passa upp á velferð þeirra.

3. Í náminu þarf nemandi að sýna vilja til að miðla sinni kunnáttu og vera tilbúinn til að kenna öðrum. 

4. Nemandi sé með mikla reynslu af tamningu smalahunda. 

5. Nemandi þarf að hafa þjálfað sinn eigin hund og hafa náð með honum 50 stigum í A - flokki í keppni á vegum SFÍ og undir deildum á síðustu 5 árum. 

6. Enskukunnátta þarf að vera góð.

7. Kennari námsins mun meta nemendur og ef hann metur að nemandi sé ekki að ná þeirri hæfni sem þarf til að vera kennari mun nemandinn ekki ljúka námi.

8. Þeir nemendur sem klára námið ber skylda til að sækja endurmenntunarnámskeið annað hvert ár sem að SFÍ stendur fyrir.

9. Þeir sem öðlast kennararéttindi borga alltaf 10% af innkomu hvers námskeið sem þeir halda til SFÍ.
   
    

Reglur Smalahundafélag Íslands um kennara sem sótt hafa menntun sína til Noregs á vegum félagsins.

1. Ef kennari verður uppvís að ósæmilegri hegðun gagnvart nemendum sínum, hundum eða kindum fær hann áminningu frá SFÍ og getur verið sviptur réttindum sínum ef brotin verða ítrekuð.

2. Kennurum ber skylda til að sækja endurmenntunarnámskeið annað hvert ár sem SFÍ stendur fyrir, þeim að kostnaðarlausu.

3. Kennarar borga alltaf 10% af innkomu hvers námskeið sem þeir halda til SFÍ.

4. SFÍ hvetur deildir félagsins til að nýta mannauðinn og fá kennara innan félagsins til að halda námskeið.

Landskeppni Smalahundafélags Íslands 2024

Landskeppni SFÍ verður haldin að Ási í Vatnsdal í Austur-Húnavatnssýslu helgina 24.-25. Ágúst.

Keppt verður í flokki Unghunda, A-flokki og B-flokki.

Úr keppnisreglum SFÍ fyrir landskeppni:

A-flokkur er aðeins fyrir hunda sem eru skráðir hjá SFÍ. Allir hundar með skráningu hjá SFÍ geta keppt í A-flokki óháð aldri.

Unghundaflokkur er aðeins fyrir hunda sem eru skráðir hjá SFÍ. Þar keppa hundar yngri en 3ja ára miðað við fæðingardag.

B-flokkur er opinn öllum þeim sem eru að stíga sín fyrstu skref á vellinum og gildir þar einu hvort um er að ræða hund eða smala. Hundar sem hafa náð 60 stigum í einu rennsli geta ekki keppt aftur í B-flokki.

Aðeins félagar í SFÍ geta keppt á landskeppni SFÍ.

Skráning í keppni á tibra90@hotmail.com, á messenger eða í síma 847-3831 Tíbrá

Minnum á aðalfund SFÍ sem haldinn verður kl.19 föstudagskvöldið 23. ágúst í Fellsbúð í Vatnsdal (við Undirfellsrétt)

 

Námskeið með George Bonsall í Ási í Vatnsdal mánudaginn 26. ágúst (mánudagurinn eftir landskeppnina)

 

Snati Húnavatnssýslu SFÍ stendur fyrir námskeiði með dómara landskeppninnar George Bonsall. Hann er bóndi, þaulreyndur dómari og hefur mikla reynslu af þjálfun og keppni.

 

Námskeiðið er hugsað fyrir hunda sem eru komnir vel á veg í þjálfun og jafnvel með keppni í huga.

 

Pláss er fyrir 8 nemendur með hund og 4 nemendur án hunds.

Verð 30 þúsund með hund. 

Verð 15 þúsund án hunds.

Innifalið hádegismatur og kaffi.

 

Skráning hjá Ingveldi veldur@gmail.com

 

Kæru félagar.

Stjórn Sfí fékk grafískan hönnuð í lið með sér til að útfæra hugmyndir af merki/lógói félagsins. Tvær útfærslur eru komnar og verður kosið um þær á aðalfundinum í ágúst.

Hér eru útfærslurnar

 

Smalahundakennaranám í Noregi.

Jo Agnar Hansen Norskur kennari hélt námskeið í vetur á Miðfossum og á því námskeiði ræddi hann við Rune Brumoen um smalahundakennaranámi sem NSG (Norsk saw og geit) er með.

Jo Agnar bauð fram aðstoð NSG til að mennta Íslenska smalahundakennara og hefur stjórn SFÍ ásamt Rune setið einn fund með Karianne Kjelstrup (ráðgjafi smalahunda hjá NSG) og Arvid Ardal (kennari) þar sem farið var yfir hvernig þetta samstarf gæti orðið.

Stjórnin er spennt fyrir þessu tilraunaverkefni og samstarfi við Noreg. Frábært að geta menntað Íslenska kennara. Hún ætlar að leggja fram tillögu á aðalfundi um þetta tilraunaverkefni og samstarfi ásamt þeirri hugmynd að SFÍ styrki félagsmenn til náms. En af sjálfsögðu verður ekki af þessu nema ef fundurinn samþykki.

Helstu punktar frá Noregi eru:

*Ýmsar kröfur eru til að fólk geti farið í þetta nám og stendur þar hæðst dýravelferð og með mikla reynslu af smalahundaþjálfun.

*Ýmsar kröfur eru eftir að fólk hefur lokið námi.

*Námsefnið verður á ensku.

*10 daga nám sem fer fram í Noregi, hugmynd að dagsetningu er í kringum mánaðarmótin nóv/des 2024 ef allt gengur eftir og ef áhugi er hjá félagsmönnum.

Stjórnin er núna að vinna undirbúningsvinnu til að geta kynnt þetta tilraunaverkefni enn betur og svarað flestum þeim spurningum sem upp geta komið á aðalfundi.

Stjórnarfundur SFÍ

Fundargerð

 

Fundur stjórnar Smalahundafélags Íslands 2.apríl 2024 kl 20.30. Á fundinum eru Ingveldur Ása Konráðsdóttir, Jens Þór Sigurðarson og Hrafnhildur Tíbrá Halldórsdóttir.

Nokkur mál voru á dagskrá og hafa sum hver verið í umræðu stjórnar frá síðasta aðalfundi.

1. Merki (lógó) Smalahundafélags Íslands
2. Dómari á Landskeppni
3. Heimasíða SFÍ
4. Reiðhallastyrkur
5. Snati ættbókarforrit
6. Fjárhundanámskeið vetur 2024

 

1. Stjórn Sfí fékk grafískan hönnuð í lið með sér til að útfæra hugmyndir af merki/lógói félagsins. Tvær útfærslur eru komnar og hefur stjórn ákveðið að kosið verði á aðalfundi um hvort merkið/lógóið skuli notað. Þau verða kynnt á fésbókarsíðu smalahundafélagsins fyrir aðalfund þar sem félagsmenn geta skoðað og gert upp hug sinn.
2. ISDS hefur samþykkt að hjálpa til við að finna dómara til að dæma Landskeppni 2024 sem gæti þá einnig mögulega haldið námskeið eftir keppnina. Ekki hefur enn borist svar frá þeim hver sá dómari verður.
3. Heimasíða smalahundafélagsins (www.smalahundur.123.is) er farin að virka og hefur stjórn því ákveðið að búa ekki til nýja síðu. Stjórnin hefur nú þegar hafist handa við að setja aftur inn efni sem ekki var lengur aðgengilegt. Því miður hafa m.a. skjöl yfir fundargerðir og úrslit keppna glatast en reynt verður eftir fremsta megni að afla afrita og setja inn á ný.
4. Engin umsókn hefur enn borist til Sfí varðandi reiðhallastyrk en umsóknarfrestur er til 1.maí. Ákveðið að minna á styrkinn á fb síðu félagsins.
5. Umræður voru um skráningar í Snata ættbókarforrit. Er það samróma álit stjórnar að hvetja þurfi með einhverjum ráðum til meiri skráninga í Snata. Töluverð gróska er í ræktun border collie fjárhunda á Íslandi þessi misserin, margir hundar hafa verið fluttir inn og mikilvægt að halda vinnulínum í sér gagnagrunni.
6. Rætt var aðeins um námskeiðin sem haldin voru í febrúar á Mið-Fossum með Jo Agnar og á Hellu með Linn Kristin. Mikið gleðiefni hve mikill áhugi er á að komast á námskeið með erlendum leiðbeinendum og ekki annað að heyra en ánægja hafi verið meðal þeirra sem sóttu námskeiðin.

Fleira ekki rætt og fundi slitið kl 22.00.

Þá er námskeiðs röðinni haust 2023 vor 2024 lokið.

 

Að þessu sinni voru haldin 6 fjárhundanámskeið með 3 erlendum leiðbeinendum:

1. Paddy Fanning á Blönduósi.

2. Jo Agnar Hansen á Miðfossum.

3. Linn Kristín Flaten á Hellu.

 

Smalahundafélag Íslands þakkar öllum þeim sem aðstoðuðu við að halda þessi námskeið og þakkar líka Landbúnaðarháskóla Íslands fyrir samstarfið.

 

Í myndaalbúmi eru svipmyndir frá námskeiðunum. 

Þann 1.febrúar stóðu Rune Brumoen og Þorvarður Ingimarsson fyrir fræðslukvöldi á vegum Austurlandsdeildar smalahundafélags Íslands.

Aukinn áhugi fólks á að koma sér upp nothæfum fjárhundi hefur aukist mikið á austurlandi síðustu tvö ár og mættu alls 28 manns.

Rune fór yfir eðli border collie hunda og hvernig best væri að standa að byrjun þjálfunar og hvernig hægt væri að byggja ofan á það með tímanum. Einnig tók hann fram að þrjú meginatriði þyrfti til að byrja að þjálfa hund. Nauðsynlegt er að hafa nokkrar kindur, svæði til að þjálfa á og ekki síst að taka sér tíma til að þjálfa. Þorvarður fór síðan yfir félagskerfið og hlutverk þess þ.e. ISDS, SFÍ, Snata og deildir undir SFÍ. Á meðan á erindunum stóð gafst gestum kostur á að spyrja framsögumenn. Út frá því spunnust umræður sem voru ekki síður gagnlegar og skemmtilegar. Það er ánægjulegt að segja frá því að töluverð fjölgun varð í félaginu og Austurlandsdeild þetta kvöld.

Í framhaldi af þessum fræðslufundi verður boðið upp á verklega tíma fyrir áhugasama á svæðinu, nokkra laugardaga í vetur sem verður með svipuðu sniði og í fyrra.